வறுகடலை

பொருட்கள்

• 2 கப் உரித்த காய்ந்த வேர்க்கடலை
• 1 பல்லு பூண்டு
• உப்பு, மிளகாய்ப் பொடி (தேவைக்கேற்ப)
• எண்ணெய் (பொரிக்க)

செய்முறை

1. ஒரு அகலமான பாத்திரத்தில் பாதியளவு தண்ணீர் விட்டுச் சூடாக்கவும்.
2. தண்ணீர் கொதிவரும் போது பூண்டை நசுக்கி அதில் சேர்த்து காய்ந்த கடலையை அதில் போடவும். மறுபடியும் கொதிவரும்போது அடுப்பை அணைத்து விட்டு 5 நிமிடங்கள் மூடி வைக்கவும்.
3. தண்ணீரை வடித்துவிட்டு ஒரு துணியை மடித்துப் போட்டு அதன் மத்தியில் இந்த கடலையைப் போட்டு துணியை மூடி உள்ளங்கையால் தேய்த்தால் தோலெல்லாம் வந்துவிடும்.
4. தோலை எடுத்துவிட்டு கடலையை ஒரு தட்டில் போட்டு 2 நிமிடம் ஆற வைக்கவும்.
5. ஒரு வாணலியில் பாதியளவு எண்ணெய் ஊற்றி காய்ந்ததும் ஒரு இரும்பு அல்லது ஸ்டீல் பிடி வைத்துள்ள பொரிக்கும் கிண்ணத்தை அதில் போட்டு அதில் கைப்பிடி அளவு கடலையைப் போட்டு பொன்னிறமாகப் பொரிக்கவும்.
6. எல்லா கடலையையும் பொரித்து வடிகட்டும் கிண்ணத்தில் போட்டு எண்ணெயை வடியவிட்டதும் சூடாக இருக்கும்போதே ஒரு பேப்பரின் மேல் போட்டு உப்பு, மிளகாய்த் தூள் தூவி கலந்து ஆறியதும் பாட்டிலில் எடுத்து வைக்கவும் (ஒரு வாரம் வரை வைத்து உபயோகப்படுத்தலாம்).
7. குறிப்பு: இம்முறையில் பொரித்தால் வேர்க்கடலை ருசியாகவும் மேலே பளபளவென்று பார்க்க அழகாகவும் இருக்கும்.