வெஜிடபிள் பர்கர்ஸ்

பொருட்கள்

• 6 தயாரித்து வைத்த கட்லெட்
• 6 வட்டமான பன்
• 150 கிராம் முட்டைக்கோஸ்
• 2 வெங்காயம்
• 2 தக்காளி
• 2 பீட்ரூட்
• தக்காளி சாஸ் (தேவைக்கேற்ப)
• துருவிய சீஸ் (விருப்பமானால்)
• 50 கிராம் வெண்ணெய்

செய்முறை

1. கட்லெட்டை வட்டவடிவில் மெலிதாகச் செய்து பொரித்தெடுக்கவும்.
2. பன்னை மத்தியில் இரண்டாக வெட்டி வெண்ணெய் தடவி லேசாக தோசைக்கல்லில் இருபுறமும் சூடாக்கி எடுக்கவும்.
3. முட்டைக்கோஸ் இலைகளை தனித்தனியாகப் பிரித்தெடுத்து சூடான தண்ணீரில் சிறிது மஞ்சள் தூள் சேர்த்து அதில் போட்டு வைக்கவும். 5 நிமிடம் கழித்து தண்ணீரை வடித்துவிட்டு இலைகளை ஈரம் வற்றுவதற்கான ஒரு துணியின் மேல் வைக்கவும்.
4. வெங்காயம், தக்காளியை மெல்லிய வட்டங்களாக அரியவும். முழு பீட்ரூட்டை வேகவைத்து தோலெடுத்து மெலிதாக சிப்ஸ் போல அரியவும்.
5. சுட்ட பன்னின் கீழ்ப்பாகத்தின் மேல் ஒரு கோஸ் இலை, அதன் மேல் வெங்காயம், கட்லெட், பீட்ரூட், தக்காளி போன்றவைகளை அலங்காரமாக அடுக்கவும்.
6. பன்னின் மேல்பாகத்தை அதன்மேல் வைத்து அதற்கென கிடைக்கும் பிளாஸ்டிக் குச்சி அல்லது பிளாஸ்டிக் முள்கரண்டியால் மேலே குத்தவும். அப்போதுதான் காய்கறிகள் கீழே விழாமல் இருக்கும்.
7. பரிமாறும் போது தட்டில் ஒரு சாலட் இலை, பொரித்த ஃபிங்கர் சிப்ஸ், தக்காளி சாஸ் இவற்றை அலங்காரமாக பக்கத்தில் வைத்து பரிமாறவும்.
8. சீஸ் பர்கர் செய்ய விருப்பப்பட்டால் பன்னின் மேல் வெண்ணெய் பூசி, மெலிதாக அரிந்த சீஸை அதன் மேல் வைத்த பிறகு மற்ற காய்கறிகள், கட்லெட் அடுக்கவும், சூடாக்கிய ஓவனில் 10 நிமிடம் வைத்து சூடாகப் பரிமாறவும்.
9. குறிப்பு: உப்பு காரம் அதிகம் தேவைப்படுபவர்கள் அரிந்த வெங்காயம், தக்காளி, பீட்ரூட்டின் மேல் சிறிது உப்பு, மிளகுத் தூள், எலுமிச்சை சாறு பிழிந்து சிறிது நேரம் வைத்திருந்து பிறகு பர்கரின் மேல் அடுக்கலாம்.