ஸ்பிரிங் ரோல்

பொருட்கள்

• 2 கப் மைதா (குவித்து)
• 4 டேபிள் ஸ்பூன் எண்ணெய்
• 2 சிட்டிகை பேகிங் பவுடர்
• 2 சிட்டிகை சமையல் சோடா
• 1 டீஸ்பூன் உப்பு
• தண்ணீர் (தேவைக்கேற்ப)
• 2 1/2 டீஸ்பூன் மைதா (எண்ணெயுடன் குழைக்க (1))
• 3 டீஸ்பூன் மைதா (தண்ணீருடன் குழைக்க (2), ஒட்டுவதற்கான பசை)
• 2 கப் பொடியாக நறுக்கிய முட்டைக்கோஸ்
• 1 1/2 கப் துருவிய கேரட்
• 1 கப் நறுக்கிய காலிப்ளவர்
• 1 கப் பொடியாக நறுக்கிய குடமிளகாய்
• 3/4 கப் நறுக்கிய வெங்காயத் தாள்
• 1/2 டீஸ்பூன் சீன உப்பு (அஜி-நோ-மோட்டோ)
• 1 1/2 டீஸ்பூன் சோயா சாஸ்
• 1 டீஸ்பூன் மிளகாய் சாஸ்
• 1 டீஸ்பூன் தக்காளி சாஸ்
• வோர்செஸ்டர் ஷயர் சாஸ் (தேவைக்கேற்ப)
• உப்பு (தேவைக்கேற்ப)
• 1/2 டீஸ்பூன் சர்க்கரை
• 1/2 டீஸ்பூன் மிளகுப் பொடி
• எண்ணெய் (சுடுவதற்கு)
• 3 பல்லு பூண்டு (அரைக்க)
• 3/4 டீஸ்பூன் மிளகாய் தூள் (அரைக்க)

செய்முறை

1. மைதா மாவை சோடா, பேகிங் பவுடர், உப்பு சேர்த்து இருமுறை சலிக்கவும். ஒரு அகலக் கிண்ணத்தில் மாவை எடுத்துக்கொண்டு எண்ணெயைச் சேர்த்து விரல் நுனிகளால் எண்ணெய் மாவோடு நன்கு சேரும்வரை கலக்கவும். தண்ணீர் தெளித்து மிருதுவான மாவாகப் பிசையவும்.
2. எண்ணெய் தடவிய பலகை மேல் மாவைப் போட்டு அடித்து, மாவு நீளும் தன்மை பெறும்வரை நன்றாகப் பிசையவும். ஒரு கிண்ணத்தில் போட்டு ஈரத்துணி கொண்டு மூடி 1/2 மணி நேரம் வைக்கவும்.
3. மசாலா செய்முறை: ஒரு அகல வாணலியில் 4 டேபிள் ஸ்பூன் எண்ணெய் விட்டுச் சூடாக்கவும். அரைத்த விழுதையும், வெங்காயத்தையும் சேர்த்து ஒரு நிமிடம் வதக்கி குடமிளகாய், கேரட், கோஸ் சேர்த்து அனலை அதிகரித்து கைவிடாமல் கிளறவும்.
4. வெங்காயத் தாள், சீன உப்பு, உப்பு சேர்த்து காய்கறி வதங்கும் வரை கலந்து கடைசியில் சாஸ் வகைகளைச் சேர்த்து கிளறி இறக்கவும்.
5. ஸ்பிரிங் ரோல் செய்யும் முறை: ஒரு ரோல் செய்ய, கலந்த மைதா மாவிலிருந்து இரண்டு சிறிய உருண்டைகள் செய்ய வேண்டும் (சிறிய எலுமிச்சையளவு). மைதா மாவில் புரட்டி நீளவாக்கில் மெல்லிய சப்பாத்தியாக இடவும்.
6. குழைத்த மாவு(1)ல் இருந்து சிறிதளவு முதல் சப்பாத்தி மேல் பூசி மேலே இன்னொரு சப்பாத்தியை வைத்து லேசாக குழவியால் உருட்டவும்.
7. ஒரு ஓரத்தில் நீளவாக்கில் மசாலாவை வைத்து சப்பாத்தியின் விளிம்பை சுற்றிலும் மைதா பேஸ்ட் 2-ஐ பூசவும். ஓரங்களை மத்தியில் வரும்படி மடித்து பாய்போல சுருட்டி ஒட்டவும்.
8. செய்த ரோல் நீள சிலிண்டர் போல இருக்க வேண்டும். எல்லா மாவையும் இதே போல செய்து எண்ணெய் தடவிய குக்கர் தட்டில் இடைவெளி விட்டு அடுக்கவும்.
9. இட்லிக்கு ஆவியில் அவிப்பதுபோல ஆனால் 2 நிமிடம் மட்டும் ஆவியில் வேக வைத்து எடுக்கவும். ஆறியதும், சூடான எண்ணெயில் சுமாரான அனலில் வைத்து 3 அல்லது 4 ரோல்களை ஒவ்வொரு தடவைக்குமாகப் போட்டு பொன்னிறமாகப் பொரித்தெடுக்கவும்.
10. பரிமாறுவதற்கு முன் ரோல்களை வட்டவடிவமாக கூர்மையான கத்தியால் 3 அல்லது 4 பாகங்களாக வெட்டவும். தக்காளி சாஸுடன் பரிமாறவும்.
11. குறிப்பு: டின்னர் அல்லது பார்ட்டிகளுக்கு இந்த ஸ்பிரிங் ரோல் செய்வதானால் முதல் நாளே செய்து, ஆவியில் வேகவைத்து எடுத்து ஒரு பாலிதீன் கவரில் வைத்து நன்றாக மூடி ப்ரிட்ஜின் ப்ரீசரில் வைக்கலாம். தேவைப்படும்போது 1/2 மணி நேரம் முன்பு எடுத்து எண்ணெயில் பொரித்து சூடாகப் பரிமாறலாம்.