அரிசிமாவு கோடிபேடலு

பொருட்கள்

• 2 கப் அரிசி மாவு (குவித்து; தயாரிப்பு முறை பெசலு கடியாலு செய்முறையில் கொடுக்கப்பட்டுள்ளது)
• 3 கப் தண்ணீர்
• 2 டீஸ்பூன் உப்பு
• எண்ணெய் (வேண்டிய அளவு)
• 1 1/2 டேபிள் ஸ்பூன் தேங்காய்த் துருவல்
• 1/2 டீஸ்பூன் மிளகு (கரகரப்பாகப் பொடி செய்யவும்)
• 1/2 டீஸ்பூன் சீரகம் (கரகரப்பாகப் பொடி செய்யவும்)

செய்முறை

1. ஒரு அகலமான வெண்கலம் அல்லது ஈயம் பூசிய பித்தளைப் பாத்திரத்தில் தண்ணீர் விட்டு அதில் உப்பு, ஒரு ஸ்பூன் எண்ணெய், தேங்காய்த் துருவல் சேர்த்து சூடாக்கவும்.
2. தண்ணீர் கொதி வரும்போது தீயை குறைத்து மாவை மத்தியில் கோபுரம் போல கொட்டி ஒரு கரண்டிக் காம்பால் குத்தி வைத்து அகலத் தட்டால் மூடவும்.
3. 2 நிமிடம் கழித்து அடுப்பை அணைத்து கீழே இறக்கி வேகமாக கட்டி தட்டாதபடி கலக்கவும். அதோடு சீரகம், மிளகுத் தூள் சேர்க்கவும். சிறிது நேரம் கழித்து கை பொறுக்கும் சூடு வந்தவுடன் மாவை நன்கு பிசையவும்.
4. தேவைப்பட்டால் தண்ணீர் தெளித்து சப்பாத்தி மாவு போல பிசையவும். கைக்கு ஒட்டாதிருக்க சிறிது எண்ணெய் தடவிக் கொண்டு பிசையவும்.
5. எலுமிச்சையளவு உருண்டைகளாக்கி விரல்களைப் போல நீளமாக உருட்டவும் (எண்ணெய் தடவிய சப்பாத்திக் கல்லின் மேல் செய்யவும்). இரு முனைகளையும் ஒன்று சேர்த்து வட்ட வடிவ சங்கிலி போல செய்யவும். எல்லா உருண்டைகளையும் இதே போல செய்து கொள்ளவும்.
6. சூடான எண்ணெயில் இளம்மஞ்சள் நிறத்தில் பொரித்து எடுக்கவும். சூடாக தேங்காய் சட்னியுடன் பரிமாறவும்.