பனீர் ரோல்

பொருட்கள்

• 1 லிட்டர் பனீர் (பாலில் செய்தது)
• 2 வெங்காயம்
• 2 குடமிளகாய்
• தேவையான அளவு உப்பு
• 6 ரொட்டி துண்டுகள்
• 1/4 டீஸ்பூன் கரம்மசாலா பொடி
• 1 டீஸ்பூன் நசுக்கிய பச்சை மிளகாய்
• 1/2 டீஸ்பூன் மிளகாய்ப் பொடி
• 2 டீஸ்பூன் மைதா மாவு
• 2 டீஸ்பூன் மக்காச்சோள மாவு
• 1 டேபிள் ஸ்பூன் மெல்லிய ரவை
• 1 டீஸ்பூன் தனியா பொடி
• 2 டேபிள் ஸ்பூன் நறுக்கிய புதினா, கொத்தமல்லித் தழை
• எண்ணெய் (தேவையான அளவு, பொரிக்க)

செய்முறை

1. பனீர் (திரிந்த பால்): பாலைக் காய்ச்சி எலுமிச்சை ரசம் சேர்க்கவும். திரிந்தவுடன் ஒரு துணியால் வடிகட்டி ஒரு மணி நேரம் தொங்க விடவும். கையினால் உதிர்த்து உபயோகப் படுத்தவும்.
2. வெங்காயத்தையும், குடமிளகாயையும் பொடியாக அரிந்து கொள்ளவும். வாணலியில் சிறிது எண்ணெய் விட்டுச் சூடாக்கி வெங்காயத்தையும், குடமிளகாயையும் வதக்கி அடுப்பிலிருந்து இறக்கவும்.
3. திரித்த பாலை உதிர்த்துக் கொள்ளவும். இதோடு மைதா, மக்காச்சோள மாவு சேர்த்து கெட்டியான மாவாகப் பிசையவும்.
4. இதோடு வதக்கிய காய்கறிகள், மிளகாய் விழுது, உப்பு, மிளகாய்த் தூள், தனியாப் பொடி, கரம் மசாலாப் பொடி, கொத்தமல்லித் தழை சேர்த்துக் கலக்கவும்.
5. ரொட்டித் துண்டங்களை ஒவ்வொன்றாகத் தண்ணீரில் முக்கி எடுத்து கெட்டியாகப் பிழியவும். இதையும் கலந்த மாவோடு சேர்த்துப் பிசையவும்.
6. எலுமிச்சை அளவு உருண்டைகள் செய்து, பிறகு நீளவாக்கில் உருட்டவும் (ஜாமூன் போல). செய்து முடித்ததும் ரவையில் புரட்டி எடுத்து 1/2 மணி நேரம் குளிர்பதனப் பெட்டியில் (Refrigerator Compartment) வைக்கவும்.
7. இளம் சூடான எண்ணெயில் பொன்னிறமாகப் பொரித்து எடுக்கவும். தக்காளி சாஸுடன் சூடாகப் பரிமாறவும்.