மெதுவடை

பொருட்கள்

• 1 கப் முழுவெள்ளை உளுந்து
• 1 டீஸ்பூன் கல் உப்பு (குவித்து)
• 2 டேபிள் ஸ்பூன் அரிசி மாவு
• எண்ணெய் (தேவைக்கேற்ப)

செய்முறை

1. உளுந்தைக் கழுவி முழுகும்வரை தண்ணீர்விட்டு 1½ அல்லது 2 மணி நேரம் ஊறவைக்கவும்.
2. ஊறியபின் தண்ணீரை வடித்து விட்டு நன்றாக நுரைக்க, கெட்டியாக அரைக்கவும். அரைக்கும்போது சிறிதளவே தண்ணீர் தெளிக்கவும். (கிரைண்டரில் அரைக்கும் மாவில் வடை நன்றாக வரும். மிக்ஸியில் அரைத்தால் அரைத்தபின் கைகளால் நன்கு காற்று உள்ளேபோய் மாவு நல்ல பதத்திற்கு வரும்படி கலந்துவிடவும்.)
3. கடைசியில் மாவைக் கல்லில் இருந்து எடுப்பதற்கு முன் உப்பு போட்டு 1 நிமிடம் அரைக்கவும். (முன்பே உப்பு சேர்த்தால் வடை கெட்டியாக இருக்கும்.)
4. வாணலியில் முக்கால் பாகம் எண்ணெய் விட்டுச் சூடாக்கவும். (சிறிதளவே மாவை எண்ணெயில் போட்டால் உடனே எழும்பி மேலே வந்தால் எண்ணெய்க் காய்ச்சல் சரியான பதம் என்று கொள்ளவும்.)
5. கைகளை தண்ணீரில் நனைத்து சிறிதளவு மாவு எடுத்து ஒரு ஈரத்துணி அல்லது பாலிதீன் கவரின் மேல்பாகத்தில் தட்டி மத்தியில் ஒரு ஓட்டை போடவும்.
6. இடது கையால் கீழுள்ள துணியைத் தூக்கி வலது கையால் தட்டிய வடையை கைகளில் சாய்த்து எண்ணெயில் போடவும்.
7. வாணலியில் உள்ள எண்ணெய் கொள்ளுமளவிற்கு வடைகளை தட்டிப் போடவும்.
8. கீழ்ப்பாகம் வெந்தவுடன் திருப்பிப் போட்டு பொன்னிறமாக வெந்ததும் எடுத்து வடிதட்டில் ஒரு நிமிடம் வடியவிட்டு சூடாகப் பரிமாறவும்.
9. இந்த வடையை இட்லி, சாம்பார், சட்னியோடு பரிமாறவும்.
10. கவனிக்க: மாவை அரைத்த உடனேயே வடை சுட வேண்டும், புளிக்கவிடக் கூடாது. ப்ரிஜ்ஜில் வைத்தால் 5 அல்லது 6 மணி நேரம் வரை மாவை வைக்கலாம். வடை எண்ணெய் குடிக்காமலிருக்க பொரிக்கும்போது சிறிதளவே அரிசிமாவு சேர்த்துக் கொள்ளலாம். ஒரு ஆழாக்குக்கு 1 பிடி துவரம் பருப்பு சேர்த்து ஊறவைத்து அரைத்தால் அவ்வளவாக எண்ணெய் குடிக்காது.
11. மாற்று செய்முறை -- இதே வடைமாவை உபயோகப்படுத்தி பலவிதமாக வடை தட்டலாம்: (1) கார வடை: ஒரு சிறிய துண்டு இஞ்சி, பச்சை மிளகாய், சிறிய துண்டு பெருங்காயம் இவற்றை நைசாக அரைத்து மாவில் சேர்த்துக் கலந்து வடை போடவும். (2) வெங்காய வடை: மிகுதியான வடை மாவில் பொடியாக அரிந்த வெங்காயம், பச்சைமிளகாய் சேர்த்துக் கலந்து வடை போடவும். (3) வெஜிடபிள் வடை: வெங்காயத்தோடு மிகப் பொடியாக அரிந்த கேரட், முட்டைக்கோஸ், பீன்ஸ், கொத்தமல்லித் தழை, சிறிதளவு உப்பு, அரைத்த பச்சை மிளகாய் விழுது சேர்த்து கலந்து வடை சுடலாம். (4) கீரை வடை: பொடியாக அரிந்த வெங்காயம், பச்சை மிளகாய் விழுதோடு அரைக்கீரை அல்லது முளைக்கீரை கலந்து வடை சுடவும். (5) ரச வடை: பருப்பு ரசத்தைச் சூடாக்கி அதில் பொரித்த உளுந்து வடையைப் போட்டு 2 மணி நேரம் ஊற வைத்து, பரிமாறும்போது சிறிது பொடியாக அரிந்த வெங்காயம், கொத்தமல்லி தூவவும். (6) சாம்பார் வடை: வெங்காய சாம்பார் செய்து கொள்ளவும். வடையைப் பொரித்ததும் ஒரு வினாடி சூடான தண்ணீரில் முக்கி எடுத்து உடனே சூடான சாம்பாரில் போட்டு ஊற வைக்கவும். பரிமாறும்போது பொடியாக அரிந்த வெங்காயம் மேலே தூவி பரிமாறவும்.