வெங்காய பக்கோடா

பொருட்கள்

• 1 கப் கடலை மாவு
• 1 கப் அரிசி மாவு
• 2 டேபிள் ஸ்பூன் நெய்
• 1 சிட்டிகை சமையல் சோடா
• 1 டீஸ்பூன் மிளகாய்த் தூள்
• 3 (அ) 4 பெரிய வெங்காயம் (நீளவாக்கில் அரியவும்)
• 4 பச்சை மிளகாய் (நீளவாக்கில் அரியவும்)
• தேவைக்கேற்ப உப்பு
• 3 டேபிள் ஸ்பூன் நறுக்கிய கறிவேப்பிலை, கொத்தமல்லித் தழை
• எண்ணெய் (பொரிக்கத் தேவையான அளவு)

செய்முறை

1. மாவு வகைகளை ஒன்றாகச் சேர்த்து சலித்து மிளகாய்த்தூள் கலந்து வைக்கவும்.
2. ஒரு அகலமான பேசினில் நெய், சமையல் சோடா சேர்த்து விரல்களினால் நன்றாகத் நுரைக்கத் தேய்க்கவும்.
3. நெய் நுரைத்து வந்ததும் சலித்த மாவை அதில் சேர்த்து, நெய் மாவோடு நன்கு கலக்கும்படி பிசறி விடவும்.
4. இதோடு நீளமாக அரிந்த வெங்காயம், பச்சை மிளகாய், கொத்தமல்லி, கறிவேப்பிலை சேர்த்து கலக்கவும்.
5. ஒரு அகல வாணலியில் எண்ணெய் விட்டுச் சூடாக்கவும்.
6. கலந்த மாவை 4 அல்லது 5 பாகங்களாகப் பிரிக்கவும்.
7. முதல் பாகத்தில் சிறிதளவே தண்ணீர் தெளித்து மாவு ஒன்றொடொன்று ஒட்டிக் கொள்ளும்படி கலக்கவும். கைகளினால் மாவை சூடான எண்ணெயில் பிசறிவிட்டு பொரிக்கவும் (பெரிய பெரிய துண்டங்களாக எண்ணெயில் விழும்படி செய்யவும்).
8. பக்கோடா பொன்னிறமானதும் வடிதட்டியில் வடியவிட்டு சூடாகப் பரிமாறவும்.
9. குறிப்பு: ஒவ்வொரு தடவையும் பொரிப்பதற்கு முன்தான் தண்ணீர் தெளித்து கலக்க வேண்டும். தண்ணீர் அதிகமானால் பக்கோடா மெத்தென்று ஆகிவிடும்.
10. மாற்று செய்முறை: (1) மெதுபக்கோடா: அரிசி மாவு 1/2 கப்பாகக் குறைக்கவும். பக்கோடா போடும்போது கொஞ்சம் தண்ணீர் அதிகம் தெளித்து தளர்த்தியாகக் கலக்கவும். (2) முந்திரிப்பருப்பு பக்கோடா: வெங்காயத்தை சேர்க்காமல், முந்திரியை மட்டும் பொடித்துப் போட்டு கொத்தமல்லித் தழை அரிந்து சேர்த்து பக்கோடா போடவும். (3) புதினா பக்கோடா: சிறிய துண்டு இஞ்சியைத் தட்டிப்போட்டு, சிறிது சோம்பு பொடி சேர்த்து புதினா, கொத்தமல்லித் தழை அரிந்து சேர்த்து பக்கோடா போடவும் -- இதற்கு வெங்காயம் போடவேண்டாம்.
11. பொது குறிப்பு: மாவில் (மைதா, அரிசி மாவு, கடலை மாவு) ஈரத்தன்மை இருந்தால் அதிக நாட்கள் பாட்டிலில் வைத்திருக்கும்போது சீக்கிரம் கெட வாய்ப்புகள் அதிகம். ஒரு பிரியாணி இலையை மத்தியில் சொருகி வைத்தால் ஈரத்தன்மையை இலை உறிஞ்சி விடுவதால் மாவு சீக்கிரம் கெட்டுப் போகாது.