சீஸ் கட்லெட்

பொருட்கள்

• 1/2 கிலோ உருளைக்கிழங்கு
• 2 வெங்காயம்
• 2 குடமிளகாய்
• 150 கிராம் முட்டைக்கோஸ்
• 7 பச்சை மிளகாய்
• 1/2 டீஸ்பூன் இஞ்சி, பூண்டு விழுது
• 1/2 கப் துருவிய சீஸ் (3 க்யூப்கள்)
• தேவைக்கேற்ப பொடி உப்பு
• 1/2 டீஸ்பூன் கரம்மசாலா பொடி
• எண்ணெய் (சுடுவதற்கு)
• 1/2 கப் காய்ந்த ரொட்டித்தூள் (அ) ரஸ்க் தூள்
• 3 டேபிள் ஸ்பூன் மைதா

செய்முறை

1. உருளைக்கிழங்கை வேக வைத்து, தோலுரித்து மசிக்கவும். வெங்காயத்தையும், முட்டைக் கோஸையும் துருவவும். பச்சை மிளகாயை விழுதாக அரைக்கவும். குடமிளகாயை பொடியாக அரியவும்.
2. வாணலியில் எண்ணெய் விட்டு சோம்பு அல்லது சீரகம் தாளித்து இஞ்சி பூண்டு விழுது, மிளகாய் விழுது சேர்த்து கடைசியில் வெங்காயம் சேர்க்கவும். வெங்காயம் லேசான பிங்க் நிறமாக மாறியதும் துருவிய கோஸ், அரிந்த குடமிளகாய் சேர்த்து சில நிமிடங்கள் கிளறவும்.
3. காய்கறிகள் வதங்கியதும் மசித்த உருளைக்கிழங்கு, உப்பு, கரம்மசாலாத் தூள் சேர்த்து வதக்கவும். அடுப்பிலிருந்து இறக்கி நன்றாக ஆறவிடவும்.
4. ஆறிய பிறகு மெலிதாகத் துருவிய சீஸ் மற்றும் பாதி ரொட்டித் தூள் சேர்க்கவும். நன்றாகக் கலந்து எலுமிச்சையளவு உருண்டைகள் செய்யவும்.
5. மைதாவில் சிறிது தண்ணீர் சேர்த்து கூழ் போலாக்கி அதில் இந்த உருண்டைகளை முக்கி, பிரட் தூளில் புரட்டி எடுத்து கைகளினால் தட்டி வட்ட வடிவமாக்கவும். விருப்பப்பட்டால் பிஸ்கட் கட்டர் உபயோகப்படுத்தி பலவித ஷேப்புகளில் சிறிய சிறிய கட்லெட் செய்யவும்.
6. 1/2 மணி நேரம் குளிர்சாதனப் பெட்டியில் வைத்திருந்து தோசைக்கல்லில் அதிக எண்ணெய் விட்டு இருபுறமும் பொன்னிறமாகும் வரை சுடவும். தக்காளி சாஸுடன் பரிமாறவும்.