ஆலூ டிக்கி

பொருட்கள்

• 1 கிலோ உருளைக்கிழங்கு
• 1/4 கிலோ பட்டாணி (அல்லது காலிப்ளவர்-1)
• 3 தக்காளி
• 1/4 கப் பொடியாக நறுக்கிய வெங்காயம்
• 1 ரொட்டி (முழு ரொட்டி)
• 1 புதினா தழை (சிறிய கட்டு)
• 1 கொத்தமல்லித் தழை (சிறிய கட்டு)
• தேவைக்கேற்ப உப்பு
• 2 டீஸ்பூன் மிளகாய்ப் பொடி
• 1 டீஸ்பூன் கரம்மசாலா பொடி
• எண்ணெய் (சுடுவதற்கு)

செய்முறை

1. உருளைக்கிழங்கையும், உரித்த பட்டாணியையும் வேக வைக்கவும். வெந்த கிழங்கை தோலுரித்து கட்டியில்லாமல் மசிக்கவும்.
2. ரொட்டித் துண்டங்களை ஒவ்வொன்றாகத் தண்ணீரில் முக்கி எடுத்து நன்கு பிழிந்து உருளைக்கிழங்குடன் சேர்க்கவும். இதோடு உப்பு, மிளகாய்த் தூள், கரம்மசாலாத் தூள், பொடியாக அரிந்த புதினா, கொத்தமல்லித் தழை சேர்த்து நன்றாகப் பிசையவும்.
3. தக்காளியை கொதிநீரில் போட்டு சில நிமிடம் கழித்து எடுத்து, தோலுரித்து அரைத்து வடிகட்டவும்.
4. வாணலியில் ஒரு ஸ்பூன் எண்ணெய்விட்டு சீரகம் மற்றும் பொடியாக அரிந்த வெங்காயம் சேர்க்கவும். வெங்காயம் பொன்னிறமானதும் தக்காளி விழுது, உப்பு, சிறிது மிளகாய்த் தூள், கரம்மசாலாத் தூள், வெந்த பட்டாணி சேர்க்கவும். ஈரம் முழுவதும் வற்றியதும் கீழே இறக்கவும்.
5. தயாரித்த உருளைக்கிழங்கு மாவிலிருந்து ஆரஞ்சு அளவு உருண்டைகள் தயாரிக்கவும். குழி செய்து மத்தியில் சிறிதளவு பட்டாணி மசாலா வைத்து மூடி மறுபடியும் உருண்டை செய்யவும்.
6. கையால் உருண்டையைத் தட்டையாக்கி கட்லெட் போல தயாரிக்கவும். சூடான எண்ணெயில் பொன்னிறமாகப் பொரித்து எடுக்கவும் (தோசைக் கல்லில் எண்ணெய் விட்டும் சுடலாம்).
7. பரிமாறும் போது தக்காளி சாஸ் அல்லது இனிப்பு சட்னி, புதினா சட்னியோடு பொடியாக நறுக்கிய வெங்காயத்தை மேலே தூவி சூடாகப் பரிமாறவும். (இனிப்பு சட்னி: பானிபூரி செய்முறையில் காண்க. புதினா சட்னி: இப் புத்தகத்தின் கடைசி பக்கங்களில் காண்க.)
8. மாற்று செய்முறை: பட்டாணிக்குப் பதில் காலிப்ளவர் அல்லது முழு பச்சைப் பயறு உபயோகப்படுத்தியும் உள்ளே வைக்கும் பூரணம் செய்யலாம். மிளகாய்த் தூளுக்குப் பதில் இஞ்சி பச்சை மிளகாய் விழுது சேர்த்து உருளைக்கிழங்குடன் பிசைந்து டிக்கி செய்யலாம். உள்ளே பூரணம் வைக்காமலும் செய்யலாம்.